پردیس وچ رہندیاں مینوں واوا ورھے ہو گئے نیں۔ ایس سارے عرصے دوران میرے دل اُتے ایہہ بوجھ رہندا سی پئی میں اپنی ماں بولی لئی کجھ وی نئیں کیتا۔ سچ پچھو تے میں گل بات لئی پنجابی چھڈ کے اردو تے انگریزی ای ورتن لگ پیا ساں۔ کوئی اَٹھ کو ورھے پہلاں قسمت نال ایہو جیہا سبب بنیا کہ میری ماں بولی نال محبت مُڑ جاگ پئی۔ اج تہاڈے سامنے جیہڑا کم پیش کر رہیا واں، ایہہ اوسے چنگیاڑی دا نتیجہ اے۔
وارث شاہؒ دی شاہکار تصنیف، ہیر، نوں پڑھدیاں، سمجھدیاں تے ایس اُتے کم کردیاں مینوں کوئی ست ورھے لگ گئے۔ مینوں بڑی خوشی اے پئی اج میں اپنی ایہہ محنت دنیا نال سانجھی کر رہیا واں۔
نوکری دیاں مصروفیتاں تے ٹبر دیاں ذمہ واریاں دے نال نال ایس کم لئی ویلا کڈھنا میرے لئی بے حد اوکھا رہیا اے۔ میں اپنے ٹبر دا دلوں شکر گزار آں، جنہاں نے بڑے پیار تے کھلے دل نال مینوں ایس کم لئی ویلا دتا، تاں جو میں اپنی ایہہ محنت تہاڈے سامنے لے کے آ سکاں۔ میں جناب سعید احمد فارانی صاحب دا وی دلوں شکر گزار آں، جنہاں نے بڑے پیار نال پاکستان توں پنجابی دیاں کجھ کتاباں ڈاک راہیں مینوں گھلیاں۔ انہاں وچ اقبال صلاح الدین صاحب دی “وڈی پنجابی لغت” وی شامل سی، جیہڑی ایس کم نوں سرے چڑھاؤن وچ میرے بڑے کم آئی۔ فارانی صاحب دی ایس محبت تے خلوص لئی میں انہاں دا تہہ دلوں شکر گزار آں۔
میں ایہہ دعویٰ نئیں کردا پئی میں کوئی وڈّا کم کر دتا اے۔ بس اپنے حصے دا اِک نِکّا جیہا دیوا بالیا اے۔ مینوں اُمید اے پئی میری ایہہ کوشش تہاڈے کم آوے گی۔ جے تہاڈے لئی ایہہ فائدے مند ثابت ہووے، تے مہربانی کر کے اپنے دوستاں، عزیزاں تے نال کم کرن والیاں نال وی ضرور سانجھی کرو۔
اپنی ماں بولی دا ساڈے اُتے وی کجھ حق اے۔ آؤ، آپو اپنے حصے دا دیوا بالیے، تاں جو ایہدی لو آون والیاں نسلاں تک پہنچدی رہے۔
مہربانی۔
